Monday, March 11, 2013

Yeej Tsim thiab Nkauj Ntxoo nkawv mus ua teb

Yeej Tsim thiab Nkauj Ntxoo nkawv ob leeg tab tom npaj mus teb.

Yeej Tsim: Koj niam, koj npaj su thiab me nyuam es koj mam li lawv qab os. Kuv mus ua ntej lawm.

Nkauj Ntxoo: Aws ua li mas.

Yeej Tsim tuaj mus teb. Ib tsam kaj ntug Nkauj Ntxoo mam li ev nws tus me nyuam thiab lub kawm thiab coj nws tus me ntxhais hlob tuaj mus teb. Tuaj txog nram teb, nkawv ob leeg ua ua teb. Ib tsam tav su nkawv ob leeg mus so. Nkauj Ntxoo nthuav mov los noj.

Nkauj Ntxoo: Yeej Tsim, tsis muaj dab tsi noj thiab es kuv kib ib qho zaub thiab tuav ib qho kua txob ntxuag mov xwb os.

Yeej Tsim: Ua cas koj ho tsis muab tus nas nag hmo kuv tua tau los ua tuaj wb noj ma?

Nkauj Ntxoo: Oh tiag os. Tsis nco qab lawm os.

Yeej Tsim: (Chim chim) Kav liam mas, lam noj lo mas.

Nkauj Ntxoo nthuav qhov kua txob los. Yeej Tsim noj.

Yeej Tsim: Ua cas es, tuav kua txob es tuav laus ua luaj li?

Nkauj Ntxoo: Twb yog kuv maj maj es thiaj li tuav tau laus me ntsis lawm xwb os.

Yeej Tsim: Tuav laus npaum no ntshe noj daig qhov quav xwb os.

Nkauj Ntxoo: Ab, txhob hais li ko mas. Laus los ntsw kom ntsim es noj kom qab xwb mas.

Yeej Tsim noj ib qho.

Yeej Tsim: Huag, cas yuav mus ntsim ua luaj li thiab os?! Koj cov kua txob no koj ua lom neeg los? Hug, tsis noj. Koj yuav noj koj mam li noj koj.

Nkauj Ntxoo: Ab, leej twg tias kua txob es tsis ntsim no na. Hauv ntiaj teb no kua txob yeej ntsim sav.

Yeej Tsim: Tshaib plab tag npaum no, ua zaub mov los tsis qab, kua txob los ntsim tag npaum thiab, teb koj mam li ua koj, su koj mam li noj koj, kuv mus tsev mus nrhiav dab tsi noj lawm. (Cia li mus tsev lawm.)

Wednesday, May 23, 2012

Maiv Liag Yuav Txiv


[Muaj ib tag kis Maiv Liag niam hu Maiv Liag kom Maiv Liag sawv los ua tshai. Hu, hu, Maiv Liag teb tias nws nkees nkees. Ib pliag, yuav kaj ntug tiag, Maiv Liag niam txawm sawv los ua mov noj.]

M. Niam:
            Maiv Liag, sawv los mas. Kav tsij sawv los nrog kuv ua tshai yuav mus teb os.

Maiv Liag:
            Niam es, txhob nthe nthe tsis zoo pw li os!

M. Niam:
            Tseem yuav zoo pw li cas thiab na. Kaj ntug qaib twb qua qua ob peb tsig lawm lo mas!

[Maiv Liag tsis teb. Ib tsam nws niam lawv ua tshai siav, nws tseem pw hauv txaj.]

M. Niam:
            Liag, ua tshai siav lawm os. Kav tsij sawv los noj tshai es yuav mus teb os.

Maiv Liag:
            Aws, kaj tsij noj mam li sawv. [Maiv Liag yeej tsis sawv li. Nws niam tsis quav ntsej tos nws ces nws niam txawm ntim ib qho su thiab lawv nws txiv qab thiab nrog cov yau mus nram teb lawm. Ib me tsam tub yuav tav su Maiv Liag mam li sawv los tshawb lauj kaub tais diav. Nws noj mov tas ces nws mam li tawm tuaj nraum zoov tuaj ntsis plaub hau thiab tu ib ce. Yeej Tsim txawm rov qab tuaj nrhiav nws.]

Yeej Tsim:
            Nyob zoo os Maiv Liag. Hnub no koj nyob xwb los?



Maiv Liag:
            Yeej Tsim, cas koj txawm siv rov qab tuaj lawm thiab na? Es koj yeej tsis muaj hauj lwm ua li los cas?

Yeej Tsim:
            Kuv yeej muaj thiab mas. Tab sis mas kuv nco nco koj ne. Koj mus lawm ntev ntev, zoo li nkauj hnub nraug hli, ib xyoo mam li pom ib zaug xwb, saib thiab nrog koj nyob tsis dhuav li hos.

Maiv Liag:
            [Ua qhov muag dub txig] Yeej Tsim, hnub no kuv tsis tau khoom es koj mus tsev es lwm hnub kuv tau tau khoom tso koj mam li tuaj nrog kuv nyob yom?

Yeej Tsim:
            Es koj twb tau tau khoom tam sis no ne? Koj tha plhu xwb twb tsis ua dab tsi ne?

Maiv Liag:
            Kuv tsis khoom os. Kuv tha plhu tas kuv yuav mus nrog kuv niam lawv ua teb os. Es koj kav tsij mus tsev.

Yeej Tsim:
            Ua cas koj ho tsis nrog lawv mus tag kis no mas. Tam sis no twb tav su, kub kub li kav liam tsis txhob mus es kuv nrog kuv nyob xwb mas los? [Cev tes los tuav nws txhais tes. Maiv Liag nchua ntia.]

Maiv Liag:
            Kav tsij mus tsev os. Kuv twb tha tas lawm kuv yuav mus. [Nws nqa nws cov khoom thiab khiav mus lawm hauv tsev. Ib me pliag nws txawm sis tawm plaws nrog lub kawm thiab kaws qhov rooj rau.]

Yeej Tsim:
            Es koj mus tiag tiag los?

Maiv Liag:
            Kuv twb hais tais kuv tsis khoom no ne.

Yeej Tsim:
            Yog li ces cia kuv ua koj luag mus os.

Maiv Liag:
            Kuv tsis yuav koj nrog kuv mus os. Kuv tau luag kawg li os tam sis no na. Twb tav su lawm pom pom kev li tau luag kawg.

Yeej Tsim:
            Tam sis no mas tsis ntshai dab, tab sis mas ntshai neej ne.

Maiv Liag:
            Kuv mus kuv xwb tau lawm os! Txhob raws kuv qab nawb! [Khiav khiav rau nram ntug zos lawm. Yeej Tsim nyob khawb khawb tau hau ces nws txawm rov qab mus tsev lawm. Maiv Liag rov qab khiav khiav los xauj tsis pom nws lawm, ces nws txawm nkag nplho hauv tsev lawm.]

[Ib tsam tav lub caij pub qaib pu npua Maiv Liag niam rov qab los tsev. Maiv Liag kaw qhov rooj nti thiab pw tsaug zog xwb. Nws niam qhi qhov rooj los tsev.]

M. Niam:
            Liag, koj mus dab tsi lawm os? Cas kaws qhov rooj nti xwb na?!

Maiv Liag:
            Oh, niam, es koj los xwb los? Es txiv lawv ne?

M. Niam:
            Koj txiv lawv tseem lawv qab os. Es hnub no koj nyob es koj ua dab tsi npaj hmo tos peb na?

Maiv Liag:
            Tsis ua dab tsi li as…

M. Niam:
            Es hnub no koj nyob xwb es koj ua dab tsi cas tsis ua hmo tos peb li mas? Ntuj os ntuj aws…zoo kawg qhov koj txiv kom kuv los ua ntej tsam ces tsis tau hmo noj no los yog tiag os…Qaib npua quaj zom zaws yuav noj mov los koj yeej pw koj ib hnub nkaus xwb es yeej tsis paub hauj lwm li los cas os Liag aws! Koj tus neeg kos ces ntub nkeeg rhau li lawm os! Sim neej no ntshe yeej tsis muaj leej twg yuav kam yuav koj li os Liag aws!  [Liag niam cem cem Liag. Liag txawm chim chim siab.]

Maiv Liag:
            Ua cas es yeej pom tsis tau luag li. Thaum twg thaum twg los cem luag tas li xwb. Yog tias mus kawm ntawv los es zoo li no xwb ces tsis ntshaw nrog txiv nej nyob li lawm os. Kuv yuav khiav mus kom deb deb os! Cas yuav ua lub niag neej dhuav siab ua luaj li os!

M. Niam:
             Peb los yeej dhuav dhuav koj li lawm thiab os. Thaum twg los tsuas yog ua yug koj nkaus nkaus xwb. Koj puas paub tias koj txiv wb twb laus laus lawm ua tsis tau hauj lwm lawm no na. Thiaj li yug koj thiab hais tias txawm koj tsis yog ib leeg tub los cia koj mus kawm txawm kawm ntshe seb koj puas yuav hlub tau koj txiv wb no na. Ua cas es kawm tas los tsuas zoo li koj kos xwb, ua tsis tau ib txog hauj lwm, pab tsis tau ib nyuag qhov li os. Zoo li koj kos xwb ces kav tsij khiav mus kom deb deb os. Seb koj yuav mus nrog leej twg nyob. Ntub nkeeg li koj kos txawm nrog leej twg nyob los lawv yeej yuav tsis tau ib tug neeg ntub nkeeg li koj kos li os!

Maiv Liag:
            Niam, koj twv kuv los? Kuv mus lawm mas, koj tsis yeej quaj nawb!

M. Niam:
            Kav tsij khiav mus lo mas! Koj yeej tsis muaj chaw mus li os!

[Maiv Liag ntsiab nkaus nws lub xov tooj ces tiaj lias nraum zoov lawm.]

M. Niam:
            Niag tub nkeeg li ntawv, cas yuav laj hais ua luaj li laus. Hais los tseem yuav cav kom yeej cuag li nws yog thiab no laib yom. Ntuj os ntuj aws…yus caj yus ces twb tsis ntub nkeeg thiab es nws ho mus yoog leej twg cas yuav tawv ncauj thiab ntub nkeeg tag npauv li os!

[Ib tsam tsaus ntuj ces Maiv Liag txiv los txog tsev. Nws niam hu lawv los noj mov.]

M. Txiv:
            Koj niam, es Liag ne. Liag pw lawm los Liag mus twg lawm los cas tsis pom nws los noj mov na.

M. Niam:
            Thaum pua tas los txog tsev, wb sib ceg me ntsis ces nws tiaj lias nraum zoov lawm tsis pom los txog tav no li as.

M. Txiv:
            Es neb sib ceg dab tsi ma? Ua cas tsis ua zoo hais tais me nyuam kom me nyuam zoo siab os.

M. Niam:
            Kuv hais tsis tau li lawm os. Thaum pua tas los txog tsev nws pw ces kuv txawm hais nws tias ua cas es ib hnub no nws nyob xwb es ua cas nws ho tsis pub qaib pub npua thiab npaj hmo tos peb no ces nws cem cem cem kuv thiab twv twv kuv ces nws tiaj lias nraum zoov lawm xwb las as…Mus txog tav no tsis pom los li as.

M. Txiv:
            Ua cas koj tsis ua zoo hais me nyuam es me nyuam khiav mus lawm tsam ua cas ne.

M. Niam:
            Laus tas li ntawv lawm, tsis ua cas li os. Khiav lawm los kav tsij khiav mus kom deb me ntsis. Kuv laj hais dhau li lawm os.

[Maiv Liag khiav mus deb deb ces nws txawm mus quaj thiab hu xov tooj rau nws tus hluas nraug nyob rau nram moos.]


Koob:
            Hello?

Maiv Liag:
            [Ua lub suab quaj quaj] Koob …

Koob:
            Maiv Liag, yog koj los? Ua cas koj yuav quaj ua luaj li na?

Maiv Liag:
            Koob, zaum no wb txhaum plaub lawm, seb koj yuav hais li cas rau kuv.

Koob:
            Txhaum plaub? Plaub dab tsi no?

Maiv Liag:
            Muaj me nyuam lawm lo mos!

Koob:
            Muaj me nyuam? Es ua cas ho muaj me nyuam no? Puas yog kuv tus os!

Maiv Liag:
            Ham tsis yog koj tus xwb le es! Tsis yog koj tus ntshe yog dab tus pob!

Koob:
            Es ua li ntawv xwb es tseem muaj tau thiab?

Maiv Liag:
            Muaj tau lo mas! … Koob, zaum no kuv niam lawv paub tas lawm, lawv cem cem kuv thiab ntiab ntiab kuv tsis pub kuv nyob lawm. Twb yog tim koj es thiaj li zoo li no, koj kav tsij tuaj tos kuv nawb!

Koob:
            Oh, es kuv tseem kawm ntawv xwb ne. Yuav ua li cas ma?

Maiv Liag:
            Yog tias koj tsis tuaj ces koj tau faus neeg tuag xwb mas. Hais li no rau koj!

Koob:
            Es yog li tam sis no koj nyob qhov twg ma?

Maiv Liag:
            Kuv tsis muaj chaw mus. Kuv nyob nraum zoov xwb.



Koob:
            Yog li cia kuv nrog kuv txiv tham tso, seb kuv txiv thiab kuv niam nkawv hais li cas kuv mam li rov qab hu rau koj.

Maiv Liag:
            Koob, koj puas hlub kuv?

Koob:
            Hlub mas…

Maiv Liag:
            Yog li ces tsis txhob nrog koj txiv tham li es cia li tuaj tos kuv xwb mas!  Tsaus ntuj lawm thiab kuv tsis tau luag na.

Koob:
            Aws…ua li mas.

[Maiv Liag tus hluas nraug, Koob, txawm cia li caij tsheb tuaj tos Maiv Liag mus nrog Koob nyob.] 

Monday, January 2, 2012

Nkauj Ntxoo Txoj Kev Hlub Zaum 2

Nkauj Ntxoo los txog ntawm ib tog kev. Nws hnov ib tug me nyuam quaj cuag cas hauv ib lub tsev tuaj. Nws saib saib, ces nws txawm rhais ob peb ruam tom ntej, tab sis nws siab ho tsis kheev ces nws ho khiav khiav rov qab los xauj. Thaum los txog ntawm lub tsev, Thaj Yeeb puag ib tug me nyuam hauv tsev. Thaj Yeeb quaj quaj heev.

Nkauj Ntxoo: Thaj Yeeb, yog koj sav?

Thaj Yeeb: Aws yog kuv os. Koj tuaj los?

Nkauj Ntxoo: Aws kuv tuaj os. Es tus me nyuam kos yog koj tus los? Ua cas nws yuav quaj ua luaj li os?

Thaj Yeeb: Aws yog kuv tus mas.

Nkauj Ntxoo: Es yog nws mob los ua cas os? Es nws niam ne? Ho mus twg lawm os?

Thaj Yeeb: Twb yog nws niam tso wb tseg tau ob peb hnub no lawm es tsis muaj neeg pub mis rau nws noj tau ob peb hnub no lawm es nws twb quaj tsis rov nrov lawm os.

Nkauj Ntxoo: Huag, yog li ces cia kuv pub kuv li mis rau nws noj. [Nkauj Ntxoo nkag los rau hauv tsev.]

Thaj Yeeb: Tsis txhob ua li ntawv os. Koj muaj koj ib tug tseem noj koj mis thiab es ib tsam tsis txaus rau koj tus noj os.

Nkauj Ntxoo: Kuv tus twb loj loj lawm thiab nws twb tsis noj mis lawm os. [Nkauj Ntxoo txawm los khaws nkaus tus me nyuam ntawm Thaj Yeeb xub ntiag thiab txawm pib ncho thiab nthws nws lub mis rau tus me nyuam noj. Thaj Yeeb txawm ntsia tsis tau ces nws txawm ntawm mus zaum nraum zoov. Nkauj Ntxoo pub tus me nyuam mis tas ces nws txawm tawm tuaj nrog Thaj Yeeb zaum.]

Thaj Yeeb: [Nws txawm xav txog thaum nws thiab Paj Nyiag nkawv ua neej thiab sib sib hlub. Thaum Nkauj Ntxoo tawm tuaj txog nraum zoov, nws so kua muag.] Oh, koj twb pub tas lawm los?

Nkauj Ntxoo: Aws. Es Thaj Yeeb, yog koj tsis xav li cas no, kuv thov nug vim li cas koj tus poj niam thiaj li tso koj tseg os?

Thaj Yeeb: Twb yog nws yug me nyuam tas, nws mob ib tug npaws xwb os. Hnub ntawv kuv ho tsis nyob zov nws, kuv ho mus txiav taws vim tsis muaj taws rauv lawm, ces thaum kuv los txog nws twb tso kuv pov tseg thaum twg lawm os.

Nkauj Ntxoo: Kuv nrog koj tu siab os Thaj Yeeb. Es ntawm koj tus me nyuam ne? Koj mam li mus yuav me nyuj los rau noj los?

Thaj Yeeb: Tam sis no ces kuv tsis muaj ib qho nyiaj li lawm os. Kuv muab siv ua nws niam lub ntees tas, tsis muaj ib qho me me li lawm. Kuv tseem nyuaj siab kawg, xyov yuav ua li cas pub kuv tus me nyuam mis os. Ntshe yus txoj hmoo yeej los li no es yus thiaj tau ua lub neej ntsuag txij ntsuag nkawm os.

Nkauj Ntxoo: Yog hais tias koj tsis muaj nyiaj mus yuav mis rau koj tus me nyuam noj los koj ho coj nws tuaj es kuv mam li pub mis rau nws noj os.

Thaj Yeeb: Nkauj Ntxoo, tsis txhob ua li kos os. Ua tsis tau li kos os.

Nkauj Ntxoo: Kuv tsis xav li cas os. Txawm yog koj yug thiab kuv yug los kuv yeej hlub ib yam. Es kuv mus tsev lawm os. Yog muaj dab tsi no lo txhob ua siab deb es tuaj ntawm kuv thiab os nawb. [Nkauj Ntxoo sawv mus tsev lawm.]

Later --

Nkauj Ntxoo: Me Naib! Me Naib aws!

Me Ntxhais: Hav? Koj hais dab tsi os niam?

Nkauj Ntxoo: Koj khiav khiav mus hais dab laug Thaj Yeeb tuaj nrog peb noj mov os.

Me Ntxhais: Aws. [Moments later...] Niam, Dab Laug hais tias nws tsis khoom es kom peb noj peb no.

Nkauj Ntxoo: Oh, es nws ho ua dab tsi?

Me Ntxhais: Nws tus me ab quaj quaj es nws tseem ntxias nws tus me ab xwb os.

Nkauj Ntxoo: Lov? Yog li ces peb noj peb os.

Me Ntxhais: Aws. [Lawv txawm noj mov.]

Later ---

Nkauj Ntxoo taug kev nrog ib pob su tuaj rau ntawm Thaj Yeeb tsev. Thaum nws tuaj txog Thaj yeeb tseem tab tom noj ib taig mov ntse dej. Nkauj Ntxoo kho qhov rooj.

Thaj Yeeb: Koj tuaj los?

Nkauj Ntxoo: Aws. Kuv nkag los puas tau os?

Thaj Yeeb: Aws, los tsev mas.

Nkauj Ntxoo: Ua cas thaum puas tas kuv tus me ntxhais kom koj tuaj noj mov koj ho tsis tuaj os?

Thaj Yeeb: Twb yog kuv tsis tshaib es kuv thiaj tsis tuaj xwb os.

Nkauj Ntxoo: Es tsam no ne? [Thaj yeeb saib nws tais mov ces nws txawm muab tso cia rau ntawm rooj.]

Thaj Yeeb: Tsis tshaib os. [Sawv. Nkauj Ntxoo rov qab tuav nws zaum]

Nkauj Ntxoo: Kuv dag xwb os. Hwb, kuv nqa tau ib qho no tuaj rau koj noj os. Koj tsis tuaj ces tshuav qhov no xwb es txhob xav li cas nawb. [Nkauj Ntxoo muab rau rau ntawm lub rooj ces nws txawm sawv mus zaum pem tus me nyuam.] Nws puas tau noj mis os?

Thaj Yeeb: Tsis tau os. Thaum puas tas nws quaj quaj tab sis kuv pub ib qho kua txuv rau nws ces nws nyuam qhuav pw tsaug zog xwb os.

Nkauj Ntxoo: Ua cas koj ho tsis coj tuaj rau kuv pub mis mas?

Thaj Yeeb: Thaum nws niam tso wb pov tseg, kuv twb coj nws mus rau ib tug niam tais pub mis, nws kuj kam pub thiab. Tab sis ob peb hnub tom qab peb muab nws niam pov tseg tas, tus niam tais ntawv tsis kam pub lawm. Nws hais tias kuv tus me nyuam ntsuag hmoov loj rhau lawm. Yog kuv pheej coj tuaj rau nws pub mis, nws tus me nyuam yuav tsis hlob, es kuv thiaj li tsis coj mus thov leej twg pub lawm os. Wb ob txiv tub yeej tiam ntawv ntsuag los li no ces cia kav liam os.

Nkauj Ntxoo: Thaj Yeeb, txhob hais li kos mas. Kuv tsis xav li kos os.

Thaj Yeeb: Nkauj Ntxoo, kav liam os. Koj pub mis rau nws noj, tsam lwm hnub wb ob txiv tub them tsis tau koj txoj kev ua zoo rov qab rau koj os.

Nkauj Ntxoo: [Rov qab los zaum rau ntawm Thaj Yeeb ib sab. Nws txawm muab tus cej puab qaib cev rau thaj yeeb] Tsuas lwm hnub nws loj, nws hlub koj xwb ces kuv zoo siab lawm os. Wb tsis txhob tham lawm. Hwb, noj tus qhov nov rau os. [Thaj yeeb cev tes los tuav tus cej puaj qaib.] Es kuv tsis tau nug koj es, koj tus me nyuam ntawv yog me nyuam tub los me nyuam ntxhais os?

Thaj Yeeb: Nws yog ib tug me tub os.

Nkauj Ntxoo: Lov? Zoo kawg li os. Es neb muab nws tis npe hu ua li cas?

Thaj Yeeb: Twb tsis tau xaiv npe thiab hu plig li os. Nkauj Ntxoo...

Nkauj Ntxoo: Hav?

Thaj Yeeb: Koj xav ne, yuav muab nws hu ua li cas?

Nkauj Ntxoo: Kuv xav, nws ntxim ntxim hlub li thiab nws muaj hmoo heev nws thiaj li tau ib leeg txiv zoo. Cia muab nws hu ua me tub Koob Hmoov. Koj xav li cas?

Thaj Yeeb: Koob Hmoov. Zoo mas, kuv nyiam kawg os. Nkauj Ntxoo, ua tsaug koj tseem pab hlub txog wb ob txiv tub ntsuag es koj tseem pab nqa mov tuaj rau kuv noj thiab os.

Nkauj Ntxoo: Tsis ua li cas. Kav tsij noj rau.

Saturday, December 31, 2011

Yeej Tsim's Regret

Nkauj Ntxoo khaws txhuv ntawm qhov rooj.

Nkauj Ntxoo: Me naib, mus tsev es mus rauv taws niam es niam yuav ua hmo rau peb noj os.

Me ntxhais: Aws. [Goes inside. After awhile, she comes out and stands next to Nkauj Ntxoo]
Niam, hmo no koj ua dab tsi rau peb noj?

Nkauj Ntxoo: Koj nug li kos es koj xav noj dab tsi os?

Me Ntxhais: Niam, kuv nqhis nqhis nqaij. Koj puas kam yuav nqaij rau kuv noj os?

Nkauj Ntxoo: Aws, ib pliag niam mam li mus nram khw mus yuav naij rau koj noj os. Es koj twb rawv tau taws rau kuv lawm lob?

Me Ntxhais: Aws.

Nkauj Ntxoo; Ces mus ua si es ib pliag niam ua mov siab niam mam hu koj thiab me tub ntxawg neb los noj.

Me ntxhais: Aws. [Looks up and sees Yeej Tsim. She runs towards him] Kuv iv! Koj los lawm lov?

Yeej Tsim: Aws, iv los lawm os.

Me Ntxhais: Iv, koj los es koj nqa tau dab tsi rau kuv na?

Yeej Tsim: Iv yuav tau ib qho qhob nom rau koj thiab me ab ntxawg neb xwb os. Es ab ntxawg neb?

Me Ntxhais: Ab ntxawg wb ua siv tov. Es iv, koj puas kam mus yuav nqaij rau kuv noj os?

Yeej Tsim: Aws, ib pliag iv mam li mus yuav nqaij los rau koj noj os. Nqa nov mus rau ab ntxawg neb noj os. [Me ntxhais takes it and runs off with it around the corner of the house. Yeej Tsim walks over to Nkauj Ntxoo and sits next to her.]

Nkauj Ntxoo; Koj tuaj dab tsi na?

Yeej Tsim: Tuaj saib me nyuam xwb.

Nkauj Ntxoo: Yog koj tuaj saib me nyuam no ces nkawv nyob pem qaum tsev pev es koj mus pev os.

Yeej Tsim; Cas koj hais li kos mas. Tuaj saib koj thiab los mos.

Nkauj Ntxoo: Kuv tsis muaj dab tsi rau koj saib lawm os.

Yeej Tsim: Neeg mas, hais lus kom zoo nws lub siab xwb lo.

Nkauj Ntxoo: Ham tsi tiag los mas.

Yeej Tsim: Es me mos ne?

Nkauj Ntxoo: Me mos tsaug zog hauv tsev.

Yeej Tsim: Tseem tsis tau noj hmo lob?

Nkauj Ntxoo: Tsis tau noj os.

Yeej Tsim: Koj puas kam ib chim kuv tuaj nrog nej cov niam tub noj hmo thiab os?

Nkauj Ntxoo: Tsis kam os. Koj kav tsij mus tsev ib tsam koj tus poj niam tsis pub koj mus tsev os.

Yeej Tsim: Tsis pub los kav liam. Mam li tuaj nrog nej pab niam tub nyob xwb mos.

Nkauj Ntxoo: Tsis txhob hais li kos. Mus, kav tsij mus tsev. Kuv tsis xav nrhiav tab meem rau koj lub neej. Kuv twb yog tus swb, thiab kuv twb yog tus tawm lawm. Kuv twb zam kev rau koj lawm kuv tsis xav rov qab thaiv koj kev.

Yeej Tsim: ua li mas...koj chim chim ces kuv mus lawm os.

Nkauj Ntxoo: Aws, kav tsij mus os. [Yeej Tsim gets up and leaves]

Later --

Nkauj Ntxoo: Me naib, coj me ab ntxawg neb los noj mov os. [Nkauj Ntxoo gets a bowl of water and washes their hands in it. Afterwards, they eat.]

Me Ntxhais: Niam, es nqaij neb?

Nkauj Ntxoo: Tsis muaj nqaij os. Niam mus nram khw lig lig es lawv twb muab yuav tas lawm. Tag kis niam mam li coj koj es wb mam li mus yuav los ua tshaib os. Es lam noj zaub.

Me Ntxhais: Tsis noj! Kuv tsis xav noj zaub, kuv noj nqaij xwb na!

Nkauj Ntxoo: Kuv twb kib tau zaub qab kawg no mas. Ab ntxawg twb noj twb tsis quaj nqaij ne. Kav tsij noj es tag kis wb mam li mus yuav los rau koj noj os.

Me Ntxhais: [Starts to cry and slams the spoon on the table] KUV NOJ NQAIJ NA! Kuv laj laj noj zaub lawm na!

Nkauj Ntxoo: Kuv twb hais tias tag kis wb mam li mus yuav no ne. Zaub no los yeej qab kawg li mas. [Me Ntxhais crie s louder than ever now. Yeej Tsim walks through the door with a bag in his hand.]

Yeej Tsim: Me naib, cas koj quaj quaj os?

Me Ntxhais: Iv, niam tsis kam yuav nqaij rau kuv noj na. [Walks over and pats me ntxhais on the head]

Yeej Tsim: Ntsiag, txhob quaj, iv twb yuav tau los rau koj noj lawm os. [walks over to the dish rack and brings a plate over and pours some cooked meat onto the plate. Nkauj Ntxoo dismisses herself from the table and stands at the door looking out. The kids start eating and Yeej Tsim turns around.] Koj niam, los noj mov mas los? [She does not reply. He walks up to her and puts his hands on her waist. She pushes him off.] Koj niam, noj mov mas lov?

Nkauj Ntxoo: Koj twb tsis hlub peb pab niam tub lawm, tsis txhob tuaj ua ua zoo lawm os. [Walks back over to the table.]

Later --

Nkauj Ntxoo kho txaj. Yeej Tsim thiab me ntxhais nkawv zaum ntawm tug cub.

Nkauj Ntxoo; Me ntxhais, los pw os.

Me ntxhais: Iv, hmo no koj nrog niam peb pw los?

Yeej Tsim: Aws, kav tsij mus pw ib pliag iv mam los. [She heads over to the bed.]

Me ntxhais: Niam, koj puas kam iv nrog peb pw os?

Nkauj Ntxoo: Tsis tau os. Hmo no yog niam yau hmo es ib pliag xwb ces iv mus tsev lawm os. Kav tsij pw es tag kis koj thiaj hnov nrog kuv mus yuav nqaij los rau koj noj os.

Me Ntxhais: Aws. [She goes to sleep. Nkauj Ntxoo walks over to Yeej Tsim.]

Nkauj Ntxoo: Tsaus ntuj lawm, koj kav tsij mus tsev os.

Yeej Tsim: Koj niam, hmo no ces kuv nrog nej pab niam tub pw mas lov?

Nkauj Ntxoo: Tsis tau os. Kuv tsis kam os. Koj twb tsis yuav peb lawm. Dab qhuas koj twb muab cais tas lawm. Kav tsij mus tsev mus tsam luag tsis qhib qhov rooj rau koj os.

Yeej Tsim: Txawm koj tsis kam kuv pw koom ib lub txaj los kuv mam li pw ntawm ntug cub xwb mas.

Nkauj Ntxoo: Koj muaj zoo txaj zoo chaw kav tsij mus pw koj txaj koj chaw. Tsis txhob ntawm kuv ntug cub tsis zoo qhov twg tuaj os.

Yeej Tsim: Kuv yeej tsis ua li cas rau koj li lo mas.

Nkauj Ntxoo: Yog, ntawm wb yeej tsis muaj dab tsi li lo mas, tab sis ib tug poj niam thiab ib tug txiv neej es ua tsis yog txij yog nkawm yuav nyob ib hmo hauv ib lub tsev tsis zoo nkauj. Txawm wb tsis ua phem los, luag yeej xav phem lawm. Hnub no, kuv twb yog tus swb, kuv twb zam kev rau koj lawm, kav tsij mus tsev.

Yeej Tsim: Koj niam, es kuv thov koj npaum no los koj yeej tsis kam kuv nyob li lov? Kuv twb nco nco kuv cov me nyuam thiab los mas.

Nkauj Ntxoo: Koj nco los tag kis kaj ntug koj mam tuaj saib. Kuv yeej tsis txiav koj kev hlub me nyuam li os. Es kav tsij mus tsev.

[Yeej Tsim gets up and walks out the door. He turns around waiting to see if she would say something to him, but instead she closes the door behind him.]

Paj Nyiag Confrontation

Paj Nyiag is at a relative's house doing her paj ntaub when the relative tells her that Thaj Yeeb's been secretly seeing Nkauj Ntxoo.

Relative: Niam Thaj Yeeb, es koj puas paub na.

Paj Nyiag: Paub dab tsi?

Relative: Es koj tsis paub tias Thaj Yeeb mus tham nig poj nrauj es nyuam qhuav nrauj txiv rov los ntawv los?

Paj Nyiag: Oh, kuv tsis paub as.

Relative: Nkawv niaj hnub tuaj mus nqa dej pem qhov dej ua ke thiab nkawv mas nim luag hiv hiv rau ub rau no xwb hos. Thiab kuv hnov tias nig poj nrauj ntawv yog koj nig thaub tus qub hluas nkauj no laib. Ua zoo saib thiab tuav yus tus txiv kom khov tsam ces lawv txeeb lawm nawb.

Paj Nyiag: Aws, ua li mas. Ua tsaug koj tseem qhia kuv thiab os.

--------------------------------------

Thaj Yeeb pw ntawm txaj. Paj Nyiag los zaum ntawm nws ib sab.

Paj Nyiag: Koj txiv, koj puas tau khoom nrog kuv tham os?

Thaj Yeeb: Koj yuav tham dab tsi os?

Paj Nyiag: [Starts to cry] Koj txiv, qhov koj niaj hnub mus no, txawm koj tsis qhia kuv los, kuv yeej paub koj mus dab tsi lawm os. Hnub no, koj tus qub hluas nkauj nrauj txiv rov qab los, ces ntshe koj yuav tsis hlub kuv li qub lawm os vim kuv ib txwm tsis yog tus koj nyiam koj hlub, tus koj tshua tus koj ntshaw thiab xav sau los ua ib lub neej nrog. Tab sis vim koj yog tus kuv nyiam kuv hlub, tus kuv tshua thiab ntshaw es kuv thiaj li ua zaj ua ntxeev kom tau koj. Txawm koj tsis hais los, kuv yeej paub zoo os. Tab sis kuv hais qhia rau koj, kuv tsis txwv tsis txiav koj kev os mog. Vim nws yog tus koj nyiam koj ntshaw. Hos hais txog ntawm kuv, kuv yuav tsis khiav nawb. Txawm koj ntiab los kuv tsis mus, koj tso los kuv tsis khiav vim kuv hlub koj os nawb.

Thaj Yeeb: Koj niam, txhob quaj mas los. Txawm tias nws nrauj txiv rov los los kuv twb tsis npaj siab yuav nws ne. Koj thiaj yog tus hlub kuv es txhob nyuaj siab os. Kuv yeej hlub koj ib leeg xwb mas nawb. Twb yog vim muaj koj cawm kuv ntawm txoj kev nyuaj siab es thiaj li muaj kuv txog niaj hnub nim no. Kuv yeej yuav nco ntsoov koj txoj kev ua zoo es txhob quaj nawb. Kuv hlub koj os.

Paj Nyiag gets up and leaves the house and goes outside. Thaj Yeeb sighs and gets up and goes after her.

Sunday, October 30, 2011

Y. Niam: Me nyab, tsis txhob chim chim os. Twb yog koj txiv wb pom tias koj yog ib tug neeg zoo es wb thiaj li kom Yeej Tsim yuav koj los ua wb nyab. Yuav tau koj lawm ces peb yeej yuav hlub koj xwb os nawb, es tsis txhob chim chim lawm os. Yog tias nyob es nco nco koj niam lawv no los ho khiav khiav mus saib. Twb tsis yog tias nyob ob peb hnub kev, nyob hauv zos no xwb es ho mus saib lawv thiab os.

Nkauj Ntxoo: Niam, zoo siab tias txiv neb tseem pom tias kuv yog ib tug neeg zoo es neb tseem nyiam kuv los ua neb nyab thiab os, thiab kuv tsis chim os, twb yog kuv los tau ob peb hnub no es kuv nco nco kuv niam lawv xwb os.

Y. Niam: Yog mas, yus los ua nyab lawm ces yus yeej nco yus niam lawv tshaj li os. Tab sis yog tias nco no los ho khiav khiav mus saib. Twb tsis nyob deb os nawb.

Nkauj Ntxoo: Aws, ua li os Niam.

--- --- ---

Nkauj Ntxoo: Yeej Tsim, ib ntus no zoo li koj nkees nkees es koj mob qhov twg os?

Yeej Tsim: Tsis mob qhov twg os.

Nkauj Ntxoo: Es yog li koj ntxhov siab qhov twg koj thiaj li ntsoos ntsoos os? Qhia kuv seb kuv pab puas tau koj thiab os lov?

Yeej Tsim: Ib tug neeg ruam li koj xwb yeej pab tsis tau. Qhia los yeej tsis nkag koj lub hlwb li os.

Nkauj Ntxoo: Yeej Tsim, txawm kuv ruam thiab koj hais tsis nkag kuv hlwb los wb twb ua niam txiv tau ntev li no lawm, muaj dab tsi los wb yuav tsum tau sab laj thiab. Yog kuv pab tsis tau los wb mam nrhiav tswv yim lwm qhov los pab los mas lov?

Yeej Tsim: Ua cas poj niam dab tsi, kuv twb hais tias koj pab tsis tau es koj pheej yuav nug kuv tag npaum.

Nkauj Ntxoo: Yeej Tsim, wb ua niam txiv ntev li no, yog kuv ua dab tsi tsis haum koj siab los thov koj qhia rau kuv es kuv mam li hloov os, tsuas wb lub neej zoo xwb kuv yeej siab ua tab nrho os.

Yeej Tsim: Tsis yog tim koj os, yog tim kuv xwb.

Nkauj Ntxoo: Yeej Tsim - [pushes her off the bed onto the floor.]

Yeej Tsim: POJ NIAM DAB TSI, kuv twb hais tas lawm es tej no yeej tsis nkag koj pob ntseg li lov?! Koj tseem yuav kom kuv hais tsawg zaus ntxiv thiab na los?!

Nkauj Ntxoo: Yeej Tsim, koj mus lawm tas hmo tas hmo los kuv twb tsis chem tsis hais koj. Es ua cas hnub no, kuv los nug koj li no xwb, es koj nim yuav muab kuv thawb ntiag rau hauv av. Koj xav nyog lawm lov?

Yeej Tsim: Koj -...

Nkauj Ntxoo: Kuv yeej paub mas, tias koj mus tas hmo tas hmo li no koj mus dab tsi. Kuv yeej paub tias koj muaj ib tug zoo zoo tos koj lawm os. Tab sis kuv lam nug seb koj puas qhia kuv qhov tseeb xwb.

Yeej Tsim: Yog koj twb paub li kos es koj pheej nug dab tsi?

continuation...

Wednesday, July 20, 2011

Yeej Tsim & Nkauj Ntxoo - Sib Nrauj

Nkauj Ntxoo ua hmo tiav thiab tab tom tos Yeej Tsim los tsev. Tos nco, Yeej Tsim los khob khob qhov rooj.

NKAUJ NTXOO: Me Naib, mus qhib koj txiv los lawm os.

Nkauj Ntxoo tus me nyuam txawm khiav khiav mus qhib. Thaum qhib tau, Yeej Tsim thiab ib tug poj niam txawm sawv ntawm qhov rooj ua ke.

NKAUJ NTXOO: Oh tus niam hluas, koj tuaj lob?

Paj Yeeb tsis teb.

YEEJ TSIM: Es hlob puas tau tuaj?

NKAUJ NTXOO: Es hlob tuaj dab tsi no?

YEEJ TSIM: Tuaj lwm qaib los mos. Cas koj yuav ruam ua luaj li!

Nkauj Ntxoo sawv tsee ntawm lub tog thiab tawm kiag rau sab nraum zoov thiab mus tuav Yeej Tsim ceg.

NKAUJ NTXOO: Yeej Tsim, koj xav zoo zoo lawm lo qhov uas koj ua li no rau wb lub neej na?

Yeej Tsim thawb kiag Nkauj Ntxoo rau hauv av.

YEEJ TSIM: Kuv yeej xav tau ntev los lawm. Tus zoo li koj, kuv yeej tsis yuav yeej tsis ntshaw. Hnub no kuv coj tau kuv tus niam nkauj mog uas kuv ib txwm hlub thiab ntshaw los lawm. Hais txog ntawm koj, koj cia li tawm mus. Koj los qhov twg los, koj rov qhov ntawv.

Yeej Tsim txawm nkag mus rau hauv tsev. Nkauj Ntxoo txawm quaj quaj thiab ntsia Paj Yeeb.

NKAUJ NTXOO: Tus niam hluas, kuv thov koj es koj tsis txhob rhuav kuv lub neej li no os. Kuv thov koj rov qab thaum tsis tau muaj plaub muaj ntug os mog. Yeej Tsim wb tej me nyuam los coob coob lawm thiab, es thov koj txhob rhuav kuv lub neeg mog.

Nws peb tus niam yau txhais taws. Yeej Tsim tawm plaws hauv tsev tuaj thiab muab nws xyeeb hlo rau ib qho chaw ces nws txawm muab Nkauj Ntxoo cov khawb ncaws pov rau Nkauj Ntxoo lub ntsej muag. Nkauj Ntxoo tus ntxhais hlob quaj quaj thiab txawm los nyob ntawm Nkauj Ntxoo ib sab. Yeej Tsim tawm plaws hauv tsev tuaj nrog Nkauj Ntxoo tus me tub thiab tus me nyuam mos ntawm tes thiab muab pov rau Nkauj Ntxoo.

YEEJ TSIM: Kuv yeej sam feej rau koj los lawm ntev lawm, hnub no kuv yuav ua tiag. Nej pab niam tub ntawm nej kuv yeej tsis ntshaw ib tug kiag. Hnub no kuv yuav tsis yuav nej los. Nej tej khaub ris khaub tsho kuv yeej muab rau nej tag lawm. Hnub no nej cia li tawm ntawm kuv lub neej mus!

NKAUJ NTXOO: Yeej Tsim, wb peb tug me nyuam tseem me me thiab tseem yau yau, es thov koj txhob ua li no rau wb lub neej os. Koj tsis txaus siab qhov twg los thov koj txhob ntiab peb es cia peb nrog koj nyob os. Txawm koj yuav niam yau lawm los kuv yeej tsis cem tsis hais koj li os. Es thov koj cia peb nrog koj nyob os mog?

YEEJ TSIM: Cas yuav mus quaj toog ntsej ua luaj! Mus, Paj Yeeb, mus wb mus hauv tsev mus tos hlob. Laj laj saib pab niam tub dev no li lawm os!

Yeej Tsim rub kiag Paj Yeeb tes mus rau hauv tsev thiab kaw qhov rooj nrov npag rau. Nkauj Ntxoo quaj quaj thiab nws txawm muab tus me nyuam tub nog ev thiab nqa tus me nyuam mos ntawm teb thiab sau cov khawb ncaws ua ib pawg ces nws txawm mus lawm.

Lawv quaj quaj los txog ib tog kev, nws pom Thaj Yeeb kwv ib cav taws los rhau nws.

THAJ YEEB: Nkauj Ntxoo...yog nej sav. Ua cas nej nqa khaub ncaws es nej yuav mus twg os?

NKAUJ NTXOO: Thaj Yeeb...hnub no Yeej Tsim coj tau niam yau los es nws tias nws tsis yuav peb lawm no es xyov peb yuav mus qhov twg os.

THAJ YEEB: Ua cas muaj dab tsi es ho tsis ua zoo hais. Twb tsaus ntuj lawm thiab es ua cas Yeej Tsim ho yuav ua tau li ntawv.

NKAUJ NTXOO: Kav liam os...nws tias cov niam tub dev zoo li peb no xwb ces nws yeej tsis ntshaw tsis yuav lawm no es peb yuav mus ntsaub lub qab zeb qab ca twg los kav liam os.

THAJ YEEB: Nkauj Ntxoo, zaum no tsis zoo li thaum wb lawm os mog. Yus muaj me tub me nyuam lawm es tsis txhob xav tej yam ruam ruam os mog. Txawm tias Yeej Tsim tsis yuav nej pab niam tub lawm los ua lub siab ntev thiab lub siab loj es tswj txoj siab nyob hlub tej me nyuam os.

NKAUJ NTXOO: Aws...ua li os. Es lig lawm thiab ces tsis xav tab kaum koj es sib ntsib dua os.

Nkauj Ntxoo tu moo li no ces nws txawm mus lawm. Thaj Yeeb tab tom yuav hais nws tab sis nws cia li khiav ceev ceev mus lawm. Thaj Yeeb xav xav ces nws cia li ua ib siab mus tsev lawm.

--- --- ---

Tag kis sawv ntxov, Thaj Yeeb niam thiab txiv hu Thaj Yeeb tuaj saj laj nram lawv tsev. Thaj Yeeb txawm sawv tuaj nyob nraum pab ntsha mloog lawv sib tham.

Txwj laus neeg hais lawv li lus tas ces lawv txawm nug Nkauj Ntxoo tias tab meem yog muaj li cas tiag.

NKAUJ NTXOO: Kuv hais li no rau nej, txij thaum kuv yuav tau Yeej Tsim los txog niaj hnub nim no, ib lub nra los nws yeej tsis pab kuv ev. Ib pluag mov los nws yeej tsis pab kuv ua. Nws tsuas yog niaj hnub mus tham hluas nkauj lawm tsheej hmo tsis los tsev li.

YEEJ TSIM tshuam nws cov lus: Hais zoo me ntsis os! Yog kuv mus lawm tsheej hmo tsheej hmo, tej me nyuam kos ho yog leej twg li?

Txwj Laus Neeg: Peb tsis tau hais koj na tub. Cia nyab hais tas tso koj mam li hais.

NKAUJ NTXOO: Nws tsuas niaj hnub nroo tias kuv tsis zoo thiab tsis yog tus nws nyiam tus nws hlub. Yug tau tej me nyuam no los nws yeej tsis pab kuv tu. Txawm muaj mob muaj nkeeg los nws yeej mus nws lawm tsheej hmo tsis paub txog tias nws muaj ib lub neej. txij li hnub ua yug tau tus mob ab, nws muab kuv ntiab tawm hauv txaj. Nws tias neeg phem li kuv kom txhob tsuj nws lub txaj lub chaw. Nws sau kuv thiab me nyuam cov khaub ncaws tuaj pov rau nraum lub txaj qhua thiab tseem muab lub qhov rooj mus rau hauv txaj xauv tib sis. Kuv xav tias yuav hais qhia rau nej los ntshe yuav ua kev txias siab rau lub neej mus lawm yav tom ntej, kuv thiaj li tsis hais. Tab sis hnub no, Yeej Tsim muab kuv khaub ris khaub tsho pov rau nraum zoov thiab nqa kuv ob tug me nyuam mos mos tuaj pov kiag rau ntawm kuv xub ntiag thiab ntiab kuv phem tshaj li ntiab dev kom tawm ntawm nws lub tsev. Nws coj tau nws tus niam nkauj mog los lawm es txawm tias peb yuav mus ntsaub lub qab zeb qab ca twg los nws yeej tsis yuav yeej tsis hlub li lawm. Yog li hnub no, thov nej nug nws seb nws puas tseem yuav peb lawm. Yog tias nws yuav, ces peb rov qab es ua lub neej ua cav lwj sib ib mus tag ib txhiab ib txhis. Txawm nws muaj niam yau thiab tsis muaj los kav liam. Tsuas muaj nws ua lub thaub hau txiv nyob ntawv rau me nyuam xwb. Ho yog tias nws tsis yuav no ces thov kom nws hais kom khov es faib khoom nyias mus nyias.

Txwj Laus neeg hais tas ces Yeej Tsim hais.

YEEJ TSIM: Kuv yeej tau ntiab lawv pab niam tub lawm tiag, thiab txhua yam lus ua Nkauj Ntxoo hais yeej muaj tseeb. Thaum ub tus kuv nyiam thiab kuv hlub yog Paj Yeeb ib leeg xwb tab sis nws mus yuav txiv lawm. Kuv thiaj li lam yuav Nkauj Ntxoo los vim tias kuv niam thiab kuv txiv nkawv nyiam Nkauj Ntxoo heev li. Tab sis, hnub no kuv tus hluas nkauj ua kuv ib txwm swm twb rov los lawm. Txawm zoo thiab phem los kuv yuav yuav nws mus kom kuv lub neej txoj sia tag. Es hnub no, kuv tuaj yeem xa Nkauj Ntxoo lawv pab niam tub rov qab mus rau niam tais yawm txiv. Txawm ntau thiab tsawg los kuv yeej tuaj yeem xa. Tej me tub me nyuam, kuv tsis ntshaw ib tug kiag li. Es yog tias nws yuav faib no seb nws faib li cas. Yog tias nws tsis kam faib no los, nws coj nws mus. Kuv mam li hlub qhov kuv hlub tau. Khoom vaj khoom tsev, faib kom ncaj hauv nruab nrab. Kuv cov lus ces muaj li no xwb.

Yeej Tsim hais lus tu moo li no ces Nkauj Ntxoo quaj quaj. Thaj Yeeb los yeej nyob sab nrauv quaj kawg li thiab. Mob thiab khib nws tias Yeej Tsim twb txeeb nws tus hluas nkauj ntawm nws xub ntiag mus yuav, ua cas Yeej Tsim ho tsis hlub es Yeej Tsim tseem yuav coj nws mus tsim.